PRES. AQUINO MENTIONS "KOMPENSASYON" FOR GOCCs IN HIS SPEECH..PLS READ

[ltr]Talumpati 
ng
Kagalang-galangang Benigno S. Aquino III
Pangulo ng Pilipinas
Sa araw ng paghahatid ng dibidendo ng Government Owned- and -Controlled Corporations[/ltr]





[Inihayag sa Bulwagang Rizal, Palasyo ng Malacañan noong ika-9 ng Hunyo, 2014]

Vice President Jejomar Binay; Senate President Franklin Drilon; Secretary Cesar Purisima; Secretary Florencio Abad; Secretary Jun Abaya; Secretary Joel Villanueva; of course, Senator Cynthia Villar; Representative Jesus Sacdalan; Undersecretary Rosalia de Leon of the National Treasury; officials of the Government Owned or Controlled Corporations; fellow workers in government; honored guests; mga minamahal ko pong kababayan:

Talagang maganda ho ang araw, at maganda ang umpisa ng linggong ito.

Mukhang marami tayong mapopondo sa lahat ng pangangailangan ng bansa dahil sa pagsisipag niyo, kaya maraming salamat pong muli. [Applause]

Ilang ulit na po nating nasabi: Ang matuwid na pamamahala ang susi sa maunlad na ekonomiya. Muli na naman itong napatutunayan ngayong araw, at kung sinumang magdududa at babatikos ay tiyak na nagbubulag-bulagan na lamang sa nagaganap na transpormasyon. Meron din ho yatang tulong ang Philhealth para sa mga nagbubulag-bulagan. [Laughter]

[ltr]Bawat taon, naisasabuhay ninyo ang inyong tunay na layunin: Ang maging tagapagtaguyod ng makabuluhang serbisyo at malawakang pag-unlad. Tapos na ang panahon kung kailan  ang mga GOCC ay ginamit ng iilan para pakapalin ang sariling bulsa; kung saan ang mga GOCC ay ginawang tambayan at parking space ng mga kabarkada at alipores ng iilang makapangyarihan. Nagpatupad tayo ng reporma, at habang umuusad ang panahon, lalo nating pinagtitibay ito; lalo nating ginagawang masigasig ang pagtatrabaho tungo sa pagbabago; at lalong nagiging imposible na bumalik pa sa dating sistema.[/ltr]

[ltr]Naaalala pa naman po siguro ninyo: Noong nagsimula po tayo, kung sino pa ang nagwaldas at nagbulsa ng pondo ng mga GOCC, sila pa ang pinakamaingay sa mga kritiko natin. Nagbato sila ng putik, nagpakalat ng kung anu-anong kontrobersya sa media. Ang gusto nilang palabasin: wala naman talagang mangyayaring pagbabago, at mananatili ang kultura ng panlalamang, palakasan, at katiwalian—kahit sino pa ang maupo sa gobyerno.[/ltr]

[ltr]Sa araw na ito, malinaw na malinaw: Hindi tayo katulad nila. Tingnan na lamang po natin ang kabuuang halaga ng dibidendong nailagak natin sa kaban ng bayan mula nang maisabatas ang ating GOCC Governance Act of 2011—na, by way of commercial, itinulak po ng The Big Man of the Senate, si Senate President [Franklin] Drilon. [Applause][/ltr]





P95.38 bilyon—tatlo at kalahating taon pa lamang ang lumilipas, nalampasan na natin ang sumatotal ng dibidendo ng mga GOCC—na nagkakahalaga ng P81.54 bilyon—mula 2002 hanggang 2010. Ibig pong sabihin nito, para mas maliwanag, ang average po nila, 9.06 bilyon sa loob ng siyam na taon ay natabunan na natin ng average na 27.25 bilyon sa ating tatlo at kalahating taon. [Applause] Ang tanong nga po ngayon, kung kaya pala itong gawin ng mga GOCC, bakit hindi nagawa noon? Napag-usapan namin ito ni Vice [President], saan kaya napunta ‘yung diperensyang mga P18 billion per year? At ngayong nagagawa na natin ito, magiging sukatan na sana ito ng inyong pagtatrabaho: Ang patuloy na pagpapataas ng dibidendong matatanggap ng gobyerno at sa huling bahagi ng taong-bayan. Sa tapat na pamamahala, mas marami tayong pondo para sa makabuluhang programa at serbisyo sa mamamayang Pilipino; natitiyak nating bawat pisong kinikita ng pamahalaan ay napupunta sa pagsusulong ng kapakanan ng ating mga kababayan.

Halimbawa nito ang isinasagawang mga hakbang ng Governance Commission for GOCCs, sa pangunguna ng ating masigasig na Chairman Cesar Villanueva, upang lalong maitaguyod ang sektor ng GOCC bilang tunay na kabalikat sa pagpapaunlad ng ating ekonomiya. Sa simula pa lang ng ating pamamahala, tinukoy natin ang mga ugat ng mga suliranin sa inyong sektor upang makapaglatag ng tamang solusyon. Inalam po natin at in-abolish ang mga GOCC na hindi naman kailangan, habang isinasaayos naman ang mga korporasyong may pareho o paulit-ulit na mandato.

Para naman po sa mas bukas at epektibong pamamahala, nariyan ang binubuo nating Integrated Corporate Reporting System. Dito po ilalagak ang mga impormasyon ukol sa gawain ng ating mga GOCC. Sa inisyatibang ito, mas mapapahusay ang ugnayan ng ating mga ahensya at korporasyon ng gobyerno. Kapag nakumpleto na ito, maaaring bisitahin ng ating mga kababayan ang kanilang website ano mang oras. At ito ang magbibigay sa kanila ng higit na kakayahan upang makilahok sa mabuting pamamahala.

Talaga nga pong malayo na ang ating narating sa ating paglalakbay sa tuwid na landas. Kapag sinabing “gobyerno kasi,” negatibo ang ibig-sabihin. Napakaraming pasikut-sikot sa mga proseso, napakabagal ng serbisyo, at hindi ka sigurado kung saan napupunta ang kaban ng bayan. Pero ngayon po, sa tulong ng inyong pakikiambag, nagbabago na ang mukha ng gobyerno. Ang dating pabigat, natabas na. Ang dating nakakasagabal, ngayon ay katuwang na. Gayundin, ang mga pinatulo ninyong pawis at ang patuloy ninyong paninindigan ang pinakamalakas nating kalasag sa mga nagbabato ng duda at intriga habang nagsusulong tayo ng transpormasyon sa lipunan. Binabati ko at pinapasalamatan ang bawat pinuno at empleyado ng mga Government-Owned and Controlled Corporations, pati na ang GCG. Malinaw po: Ang tagumpay ng ating mga pagpupunyagi ay tagumpay ng bawat Pilipino.

Kasabay ng pagbati ko sa inyong naiambag, inaasahan kong hindi kayo magsasawa sa masigasig na pagtupad sa inyong mga tungkulin. Nailatag na natin ang mga pundasyon. Sama-sama nating abutin ngayon ang mas matatayog pang pangarap. Gamitin natin ang pagkakataong ibinigay sa atin upang siguruhin na kapag may Juan o Juanang nagsabing “gobyerno kasi,” ang tinutukoy niya ay isang pamahalaang mabilis sa pagtugon sa pangangailangan ng mamamayan, matapat sa paglilingkod, at walang ibang isinusulong kundi ang interes ng buong sambayanan.

Magandang araw po. Maraming salamat po sa inyong lahat.